AGAPI (Asociación Galega de Produtoras Independentes) escríbese sempre en paralelo ao sector audiovisual de Galicia, dende a súa constitución no ano 1994.

AGAPI é a asociación empresarial pioneira do sector audiovisual galego; agrupa a máis de trinta empresas produtoras de cine, televisión, publicidade e servizos e leva contribuíndo activamente á consolidación e desenvolvemento da industria de Galicia dende hai máis quince anos.

AGAPI ten especial interese na constante evolución e actualización de coñecementos dos profesionais da industria audiovisual. Dende a súa creación AGAPI organizou numerosos seminarios de formación especializada, que abarcan dende os aspectos máis creativos ata os máis innovadores e tecnolóxicos.

Conscientes da importancia da internacionalización e comercialización dos produtos audiovisuais, AGAPI organizou no 2004 a presenza por primeira vez dunha representación de Galicia no maior e máis importante mercado de contidos audiovisuais do mundo, o MIPCOM de Cannes.

Seguindo nesta liña, AGAPI tamén realizou o primeiro Catálogo da Produción Audiovisual de Galicia.

Destacamos algunha das últimas e importantes accións de AGAPI como a súa participación no proceso de elaboración para a aprobación da nova Lei Estatal do Cine (Lei 55/2007). AGAPI tomou parte neste proceso como única asociación de empresas produtoras independentes convidada a comparecer no Congreso dos Deputados.

Tamén destacamos a organización dos relevantes encontros profesionais “Novas Formas de Distribución e Consumo Audiovisual- NOVOMED" e o “Foro de Marketing e Comercialización Audiovisual".

A Asociación entende que o audiovisual é un sector estratéxico e de futuro para Galicia; o audiovisual tamén é industria cultural, conxugando intereses empresariais e culturais nunha mestura na que os dous elementos teñen a mesma importancia e fortaleza.