Editorial Galaxia pon á venda 72 e-books dende a súa web

2010-07-20

Dende o 15 de xullo é posible mercar os eBooks da Editorial Galaxia directamente dende a súa web (http://www.editorialgalaxia.com). Deste xeito, 72 títulos da literatura galega de todos os tempos puxéronse ao alcance dun simple clic.

Dende a portada web, a editorial elaborou un espazo que leva directamente ao portal de distribución de contidos dixitais onde se ofrecen todos os títulos ordeados alfabeticamente. A idea da editorial é ir incorporando progresivamente máis títulos ata poñer en formato dixital descargable para os lectores electrónicos a totalidade do catálogo.

A Editorial Galaxia continuou deste xeito o seu proceso de innovación nun ano, o 2010, no que conmemora os seus sesenta anos de vida. Tralo blog da editorial, que ofrece ademais da actualidade de Galaxia, artigos de opinión, espazos para o debate e galerías de arte co traballo dos seus ilustradores, e o seu desembarco nas redes sociais (Facebook e Twitter), o espazo web medrou con este novo servizo que permite que a lectura en galego, e a cultura do noso país, se adapte aos vieiros da vida contemporánea.

http://www.editorialgalaxia.es/