The Way, de Filmax Animation, preséntase no Festival Internacional de Cine de Toronto (TIFF)

2010-07-29

Filmax Animation rodou o agardado título The Way ao longo do Camiño de Santiago no pasado ano. Os profesionais estadounidenses de orixe galega Martin Sheen e Emilio Estévez protagonizan e dirixen esta película sobre un oftalmólogo que percorre o Camiño para cumprir o último desexo do seu fillo.

Martin Sheen volveu a Galicia, terra de orixe do seu pai, para interpretar a Tom Avery, un reputado oftalmólogo que vive en California. Avery recibe unha chamada dende Francia na que lle comunican que o seu fillo, Daniel (Emilio Estevez) faleceu nun temporal nos Pirineos mentres realizaba o Camiño de Santiago. A pesar de que a súa relación nunca foi moi boa, Tom decide viaxar a Francia e facer o Camiño por el. Emilio Estévez dirixe a película que tamén conta co traballo dos actores Santi Prego, Carlos Leal, Deborah Kara Unger, Yorick van Wageningen, James Nesbitt, e Ángela Molina.

The Way foi seleccionada para participar no Festival Internacional de Cine de Toronto. Do 9 ao 19 de setembro este certame convértese no marco de presentación das principais novidades da tempada cinematográfica e nunha das citas máis importantes do mercado norteamericano.

http://www.filmax.com/